Вечерня
Блажен муж: На Господи воззвах, стихиры, глас 5: Подобен: Радуйся:
Радуйся, великий новграде,/ красуйся и ликуй, церковь божия;/ днесь бо светило великое нам явися,/ многоцелебныя мощи блаженнаго иакова,/ и мир весь просвещают богодарованными чудесы,/ яко источник неисчерпаемый показашася,/ и яко струи точат исцеления/ верою приходящым к раце блаженных мощей его;/ дарует бо здравие неоскудно,/ болящым во гресех великое врачевание,// и христа молит даровати душам нашым мир и велию милость.
Радуйся, богомудре отче иакове;/ твоя бо мощи всечестныя и святыя/ обильно всегда источают исцеления, верно приходящым,/ благоухания всех исполняющя духовнаго,/ и тьму демонскую далече отгоняющя./ Темже молим тя,/ всякаго навета вражия нас избавити;/ яко да радостною душею и чистым сердцем/ святое твое пренесение духовно празднующе,// молимся даровати душам нашым мир и велию милость.
Радуйся, премудре отче иакове,/ ангельское на земли житие пожил еси,/ духови плоть повинул еси,/ пощением же и воздержанием свет мирови явился еси;/ украсился бо еси, блаженне,/ святей троице обитель себе соделал еси,/ и дарования чудес от нея сподобился,/ исцеляти различныя недуги,/ приходящым с верою к раце мощей твоих/ и празднующым святое пренесение;// моли даровати душам нашым мир и велию милость.
Слава, глас 4: Преблаженне отче наш иакове,/ благодатию божественнаго духа,/ обильно всегда источаеши исцеления,/ с верою приходящым к раце мощей твоих,/ юже приял еси от всех царя христа бога./ Егоже детелию духи лукавыя от человек отгоняеши,/ исцеляеши страсти неисцельныя,/ и просвещаеши верных сердца блистанием чудес твоих,/ с вышними же лики ныне на небесех водворяешися, богомудре,/ и радости неизреченныя сопричащаешися./ Темже днесь празднующе пренесение твое/ моли, молим тя, молитвами твоими/ даровати нам пособие на враги,/ и мир мирови испроси,/ належащих нам скорбей душевных и телесных страстей// свободи молитвами твоими.
И ныне, богородичен: Иже тебе ради:
Вход. Прокимен дне. И чтения три.
Премудрости соломони чтение (главы 5 и 6):
Праведницы во веки живут, и в господе мзда их, и попечение их у вышняго. Сего ради приимут царствие благолепия и венец доброты от руки господни; зане десницею покрыет я и мышцею защитит их. Приимет всеоружие рвение свое, и вооружит тварь в месть врагом; облечется в броня правды, и возложит шлем, суд нелицемерен; приимет щит непобедимый, преподобие; поострит же напрасный гнев во оружие; споборет же с ним мир на безумныя. Пойдут праволучныя стрелы молниины, и яко от благокругла лука облаков, на намерение полетят. И от каменометныя ярости исполнь падут грады; вознегодует на них вода морская, реки же потопят я нагло. Сопротив станет им дух силы, и яко вихор развеет их; и опустошит всю землю беззаконие, и злодейство превратит престолы сильных. Слышите убо, царие, и разумейте; навыкните, судии концев земли; внушите, держащии множества и гордящиися о народех языков; яко дана есть от господа держава вам, и сила от вышняго.
Премудрости соломони чтение (глава 3):
Праведных душы в руце божией, и не прикоснется их мука. Непщевани быша во очесех безумных умрети, и вменися озлобление исход их, и еже от нас шествие сокрушение; они же суть в мире. Ибо пред лицем человеческим аще и муку приимут, упование их безсмертия исполнено; и вмале наказани бывше, великими благодетельствовани будут; яко бог искуси я и обрете их достойны себе. Яко злато в горниле искуси их, и яко всеплодие жертвенное прият я; и во время посещения их возсияют, и яко искры по стеблию потекут. Судят языком и обладают людьми, и воцарится господь в них во веки. Надеющиися нань разумеют истину, и вернии в любви пребудут ему. Яко благодать и милость в преподобных его, и посещение во избранных его.
Премудрости соломони чтение (глава 4):
Праведник аще постигнет скончатися, в покои будет. Старость бо честна не многолетна, ниже в числе лет исчитается; седина же есть мудрость человеком, и возраст старости житие нескверное. Благоугоден богови быв, возлюблен бысть, и живый посреде грешник, преставлен бысть; восхищен бысть, да не злоба изменит разума его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга; угодна бо бе господеви душа его; сего ради потщася от среды лукавствия. Людие же видевше, и не разумевше, ниже положше в помышлении таковое, яко благодать и милость в преподобных его, и посещение во избранных его.
На литии стихиры, глас 4. Самогласны:
Приидите, вернии, хвалами сошедшеся/ ныне составим торжество, в честнем празднице/ честнаго пренесения блаженнаго иакова,/ духовно празднующе/ к нему возопием:/ моли, молимся, нам победительная на враги даровати;/ тебе бо молитвенника ко владыце тепла стяжахом// подающаго мирови велию милость.
Возсия днесь пресветлая память твоя, богомудре иакове,/ созывающи ны празднолюбцы к похвалению/ и славе христа бога нашего./ Тем притекающе к раце мощей твоих,/ исцеления дар приемлем,/ и тебе прославльшаго спаса христа воспеваем во веки,// непрестанно славяще.
Отче преблаженне иакове,/ днесь любовию сошедшеся к честней и чудотворней твоей раце,/ светло торжествующе гласы песненными,/ псаломски вопиюще глаголем:/ блажен муж, бояйся господа,/ непорочно бо в заповедех господних ходил еси./ Темже ныне с праведными на небесех водворяешися;// с нимиже молися господеви, спастися душам нашым.
Слава, глас 4: Духовною благодатию отъемлеши недуги страстей,/ и отгониши духи лукавыя,/ и исцеляеши страсти неисцельныя, иакове всеславне,/ и просвещаеши сердца верных блистании чудес твоих./ Темже днесь гласы немолчными воспеваем// пресветлую и светоносную память твою.
И ныне, богородичен: Призри на моления:
На стиховне стихиры, глас 8: Подобен: О, преславнаго чудесе!
О, преславное чудо!/ Божиим мановением рака твоя, блаженне,/ на кре пришедши, ста недвижимо./ Вернии же людие обретше тя,/ радостию и любовию приемляху./ Молитвами твоего угодника, христе боже,// спаси душы нашя, яко милосерд.
Стих: Честна пред господем смерть преподобных его.
О, преславное чудо!/ Сиянием духа пресвятаго просвещавши весь мир,/ притекающих к раце мощей твоих,/ богомудре иакове./ Темже вернии сошедшеся/ в твое пренесение,/ господеви вопиют:// иисусе царю, спаси душы нашя, яко милосерд.
Стих: Блажен муж бояйся господа, в заповедех его восхощет зело.
О, преславная истинная чудеса блаженнаго иакова,/ како возможем похвалити,/ или ясно изглаголати?/ подает бо различная исцеления,/ не токмо притекающым к раце мощей его,/ но и везде призывающым имя его,/ никогдаже скудны своих чудес оставляет./ И ныне молися, блаженне иакове,// даровати нам велию милость.
Слава, глас 6: Возсия днесь пресветлое торжество,/ отче богомудре иакове;/ ты бо от младенства богу прилепился,/ и того стопам последовал еси;/ мирский мятеж аки нуждное волнение преплыл еси,/ и ныне на небесех живеши./ Мы же покланяющеся мощем твоим,/ верно от душы христа славословим,/ давшаго нам тебе тепла молитвенника к богу./ К немуже о нас молися,/ чтущих и верно празднующих твое пренесение,// спастися душам нашым.
И ныне, богородичен: Творец и избавитель:
Тропарь, глас 1:
Божественною благодатию просветився,/ и по смерти даруеши исцеление/ притекающым к раце мощей твоих премудре иакове;/ темже и мы ныне чтим честных мощей твоих пренесение,/ веселяще вкупе душы и телеса./ Тем вси вопием:/ слава давшему ти крепость!/ слава венчавшему тя!// слава действующему тобою всем исцеления!
Слава, и ныне, богородичен: Гавриилу вещавшу:
Утреня
По 1 стихословии седален, глас 4: Подобен: Явился еси: Пресветлую твою память/ днесь торжествующе,/ спаса и господа/ молити прилежно,/ тя молим, отче иакове,// всем подати согрешений прощение. Дважды.
Слава, и ныне, богородичен: Теплое заступление сущым в бедах,/ и помощницу нашу,/ и к богу пременение,/ еюже тли избавихомся,// богородицу вернии ублажаем.
По 2 стихословии седален, глас 1: Подобен: Лик ангельский: Житие на земли благочестно скончав,/ приятелище духа святаго явился еси,/ просвещая к тебе верою притекающыя, блаженне./ Темже моли владыку и господа,/ просветити душы нашя, воспевающих тя,// иакове богоблаженне отче наш. Дважды.
Слава, и ныне, богородичен: Всех творца и господа и зиждителя,/ всенепорочная, чистая,/ духом божественным в ложеснах заченши,/ без истления родила еси./ Егоже славяще, тя воспеваем, дево,// яко палату всех царя и мирови спасение.
По: Хвалите имя господне, припев:
Ублажаем тя,/ святый праведный иакове,/ и чтем святую память твою;/ ты бо молиши за ны// христа бога нашего.
Псалом: Терпя потерпех господа:
По полиелеи седален, глас 8: Подобен: Премудрости: Плотския страсти воздержанием, отче, увядил еси,/ и благодать духовную восприял еси./ Тем и сосуд достоин был еси,/ и по кончине явился еси страсти очищая,/ отче иакове;/ моли христа бога,/ грехов оставление даровати,// чествующым любовию святое твое пренесение. Дважды.
Слава, и ныне, богородичен: Яко деву и едину в женах,/ тя без семене рождшую бога плотию,/ вси ублажаем роди человечестии;/ огнь бо вселися в тя божества,/ и яко младенца доиши зиждителя и господа./ Тем ангельский и человеческий род,/ достойно славим пресвятое рождество твое, и согласно вопием ти:/ моли христа бога, согрешений оставление даровати// покланяющымся верою пресвятому рождеству твоему.
Таже степенна, 1-й антифон 4-го гласа.
Прокимен: Честна пред господем смерть преподобных его.
Стих: Что воздам господеви о всех:
Всякое дыхание: Евангелие от матфея, зач. 43.
По 50-м псалме стихира, глас 6:
Приидите, вси людие,/ хвалу принесем блаженному, вопиюще:/ радуйся, пресветлый столпе,/ просвещаяй нас чудес светлостьми;/ радуйся, росоносный облаче,/ пламень погашающь страстей/ и орошающь верных мысли./ Радуйся, моляйся христу,/ еже подати нам победы на враги,// и умирити мир, и спасти душы наша.
Канон богородицы, со ирмосом на 6
И святаго канон, на 8. Егоже краегранесие по алфавиту до девятыя песни: Совершен же списавшаго именем, глас 5-й.
Песнь 1.
Ирмос: Спасителю богу,/ в мори люди немокрыми ногами наставльшему,/ и фараона со всевоинством потопльшему;// тому единому поим, яко прославися.
Агнче божий слове, даждь ми слово недостойному твоему рабу, да возмогу воспети в память, пренесения мощей блаженнаго иакова торжество, взывая: тому единому воспоим, яко прославися.
Безвестная и тайная последнему роду явлена быша, честныя мощи твоя, премудре иакове, к нимже прикасающеся, освящение приемлем, господеви поюще: того единаго воспоим, яко прославися.
Всесвятая твоя память возсия мирови, яко солнце просвещает душы благочестно поющих тя, в нейже молися, блаженне, подати очищение грехов, господеви зовущим: того единаго воспоим, яко прославися.
Богородичен: Господородительнице чистая, небесный входе, горо несекомая, дверь непроходимая, апостолом слава, преподобным красота, приими моление наше, еже ти приносим в память блаженнаго иакова, господеви поюще: того единаго воспоим, яко прославися.
Катавасия: Отверзу уста моя:
Песнь 3.
Ирмос: Водрузивый на ничесомже землю повелением твоим,/ и повесивый неодержимо тяготеющую,/ на недвижимем, христе, камени заповедей твоих// церковь твою утверди, едине блаже и человеколюбие.
День празднственный днесь празднуют народи великаго новаграда; обретоша бо мощи блаженнаго иакова, яко некое сокровище богатно, непрестанно христу зовуще: церковь твою утверди, едине блаже и человеколюбие.
Естество тленное ни во чтоже вменив, житие чистое на земли пожил еси, и сего ради наследовал еси небесное селение; моли и нам получити тамошнее блаженство, празднующым твое пренесение, да непрестанно христу зовем: церковь твою утверди, едине блаже и человеколюбие.
Житие твое яко солнце в сердца верных возсия, зарю чудес испущая. Темже и нас невечерним светом озари, всечестное твое пренесение почитающих, да непрестанно христу зовем: церковь твою утверди, едине блаже и человеколюбче.
Богородичен: Зело люте погружаемую душу мою в пучине житейских страстей, и бурею одержимую безмерных согрешений, спасения ми простри руку, пречистая, и изведи из глубины зол моих, да радуяся славлю тя всенепорочную.
Седален, глас 5: Пресветлая и светоносная, отче богомудре иакове, приспе твоя память, созывающи верных множество, прославити и пети твое честное пренесение, просим от христа прияти велию милость. Дважды.
Слава и ныне, богородичен: Явилася еси вышши небесных сил, владыку и господа рождши, богородице, земных естество возвела еси, богоневестная. Темже тя воистинну, богородительнице, сердцем и душею вернии славим.
Песнь 4.
Ирмос: Дела смотрения твоего, господи,/ ужасиша пророка аввакума;/ изшел бо еси на спасение людей твоих,// спасти помазанныя твоя пришел еси.
Землени бо есмы, и перстни человецы, верно припадаем ко пречестным мощем твоим, блаженне иакове, просяще отпущения грехов, молися о верно празднующих твое честное пренесение.
Иже крест взем, блаженне, и желаемаго ти отечества достиг горняго иерусалима, и в нем со ангелы ликуеши, иакове, премудре, молися о чтущих твое честное пренесение.
Иакове преблаженне, ныне на небесех с праведными веселишися, с нимиже молися христу предстоя, мир мирови даровати, и народу нашему на враги побеждение, и всем скорбящым утешение.
Богородичен: Кто не удивится, или кто не почудится человеколюбию божию? Сшед бо с небесе, и воплотися нас ради из тебе без отца, едина всепетая. Егоже моли избавитися рабом твоим от всякия скорби.
Песнь 5.
Ирмос: Окаянную душу мою нощеборющуюся со тьмою страстей,/ предварив ущедри,/ и возсияй мысленное солнце днесветлыя звезды во мне// во еже разделити нощь от света.
Любовию чтуще твое пренесение, прилежно тя молим, премудре иакове, не престай моляся христу богу, да приимем грехов простыню, и да озарит нас в нощи свет.
Множество народа великаго новаграда, сошедшеся днесь в твое пренесение, блаженне иакове, прикасающеся честным мощем твоим, от них исцеления почерпаем, непрестанно зовуще: да озарит нас в нощи свет.
Не токмо в житии бывшу ти, но и по смерти многа чудеса от честныя твоея раки содеваются, приходящым с верою, всеблаженне иакове, недуги прогоняеши, и от бед избавляеши силою христовою. К немуже непрестанно зовем: да озарит нас в нощи свет.
Богородичен: Он вселукавый по вся дни к горшым влечет мя, и в ров погибели влагает, и во отчаяние мя влечет; но того мя ловления, чистая, исхити, и творити волю божественную сына твоего и бога нашего настави, и в час страшнаго пришествия его избави мя всякаго осуждения.
Песнь 6.
Ирмос: Обыде мя бездна,/ гроб мне кит бысть;/ аз же возопих к тебе человеколюбцу,// и спасе мя десница твоя, господи.
Приидите, соберитеся, великаго новаграда народи, светло празднуем пренесение мощей блаженнаго иакова; молится бо ко владыце и богу нашему, да избавит нас от всякаго озлобления. К немуже воспевающе глаголем: спасе нас десница твоя, господи.
Рака мощей твоих, премудре иакове, дражайши сапфира показася; чудотворива бо бе, исцеления источающи. Юже облобызающи верни, радостно от души христу зовем: спасе нас десница твоя, господи.
Светлыми сиянии обретошася на кре честныя твоя мощи, иакове пречудне, ныне аки заря пресветлая, просвещают и освещают чтущих тя верно, и радостно от души христу зовущих: спасе нас десница твоя, господи.
Богородичен: Тебе чистую деву нескверную, едину имам стену непреобориму, прибежище и покров крепок, и оружие спасения; да мя не презриши окаяннаго, надеждо ненадежным, скорбящим радость и заступление.
Кондак, глас 8: Подобен: Взбранной:
Верою и любовию твое честное пренесение празднующих, блаженне,/ сохрани и соблюди от всякия злобы и соблазна змиина;/ имаши бо дерзновение ко владыце всех, христу богу;/ егоже моли спасти люди, молящия тя,/ да вси вопием ти:// радуйся, отче иакове, всея российския земли удобрение.
Икос:
Ангел на земли житием показався,/ ангелы удивил еси, бесы же устрашил еси,/ и человеки просветил еси зарями чудес твоих,/ богоносе и преблаженне отче наш иакове./ И ныне нас вразуми воспевати песнь к твоему хвалению,/ радостным гласом сице глаголющих:/ радуйся, оставивый тленное мудрование и приемый нетленный венец;/ радуйся, терпеливый душею, злокозненнаго врага под ногама стерл еси./ Радуйся, нижнее мудрование оставль, и вышняго царствия достиг;/ радуйся, целителю болезней и отгонителю страстей.// Радуйся, отче иакове, всея российския земли удобрение.
[Здесь, по благословению настоятеля, возможно прочтение
Акафиста святому блаженному Иакову]
Песнь 7.
Ирмос: Огня гасилище, отроков молитва,/ орошающая пещь проповедница чудесе,/ не опаляющи, ниже сожигающи// песнословцы бога отец наших.
Устави нынешнюю бурю, обдержащую нас, блаженне, и укроти молитвами твоими, и варварское нахождение низложи, и нас на сопостаты укрепи, и на противныя победы даруй, да радующеся поем: боже, благословен еси.
Фарисейски не лицемеруем, но со смирением и радостию прикасающеся к честней раце твоей, премудре иакове, просим прощения грехов христу от души вопиюще: боже, благословен еси.
Хранитель буди великия россии, христолюбивому народу нашему, богомудре иакове, сохраняяй от поганых нашествия, и междоусобныя брани, глада же и пагубы, да молитвами твоими избавльшеся, радостно от души христу зовем: боже, благословен еси.
Богородичен: Отчаявшымся еси велие прибежище, обуреваемым тихое пристанище еси, богородице. Темже и мы припадающе да не постыдимся, мати истиннаго живота, тебе благодаряще и поюще: благословенна ты в женах, всенепорочная владычице.
Песнь 8.
Ирмос: Оросившаго пещь, и отроки сохраншаго, посреде горящаго пламене,/ отроцы славословите,/ священницы благословите,// людие превозносите во вся веки.
Церкви российстей украшение и молитвенника тя тепла стяжавше, и скораго помощника, и яко стену тверду и забрало недвижимо и необуреваемо, молим тя, не забуди молитвенник твоих, избавляй нас от всякия нужды и печали, да радующеся христу зовем: людие, превозносите его во веки.
Чудес источник рака твоя явися, иакове преблаженне, от неяже обильно вси притекающии приемлют телесем здравие, и душам спасение, твоими молитвами, да радующеся христу зовем: людие, превозносите его во веки.
Шествие твое добре скончал еси, и мирский мятеж аки безбурное пристанище преплыл еси, и ангельски на земли пожил еси, плоть твою духови повинул еси, и ныне на небесех предстоя всех царю христу, поминай чтущих твое пренесение, емуже зовем: людие, превозносите его во веки.
Богородичен: Щедраго и человеколюбиваго спаса рождши, чистая, того моли, ущедрити раба твоего, и к покаянию пути настави; лукаваго соблазны от сердца моего отжени, и того избави ловления, и огня вечнаго исхити, яко да непрестанно пою тя чистую во вся веки.
Песнь 9.
Ирмос: Исайе, ликуй,/ дева име во чреве, и роди сына еммануила,/ бога же и человека, восток имя ему;// егоже величающе, деву ублажаем.
Источник исцеления испущающи, врачевание же безмездно, ковчег священия твоих мощей рака явися; из неяже почерпаем здравие присноживотное, притекающии верно, блаженне иакове, и тебе даровавшаго в песнех величаем.
Возвеличил еси на земли твоего владыку; тем и в твое пренесение глубину чудес показа, и струю неоскудеваему раку мощей твоих, иакове премудре; слепым еже видети даровася, прокаженным очищение; и одержимыя нечистыми духи целомудрены твориши; темже тя величаем.
Недостойною моею рукою принесох ти таковое слова извитие; богомудрый иакове, не презри, но прими сие с любовию, и моли за мя владыку и господа, тамошняго мя избавити мучения, и милость обрести в день страшнаго испытания.
Богородичен: Владычице мира богородице, во глубине зол погибели, погруженнаго злоумно сластьми плотскими, и пристрастием вещьми жития, изведи, пресвятая дево, твоим милосердием; ибо не имам надежды, весь бо есмь, чистая, во отчаянии; да тя непрестанно величаю.
Светилен: Подобен: Жены, услышите: Якоже солнце облистая, чудеса испущаеши, просвещая верных сердца; твое славное пренесение верно празднующыя спасай, богомудре иакове, отче наш. Дважды.
Слава, и ныне, богородичен: Тя предстательницу имамы грешнии, о пресвятая дево; ты благопременна сотвори сына твоего и бога нашего, матерними твоими молитвами.
На хвалитех стихиры на 4, глас 4: Подобен: Яко добля:
Приидите, вернии, хвалами сошедшеся,/ ныне составим торжество,/ в честнем празднице честнаго пренесения блаженнаго иакова/ духовно празднующе к нему возопиим:/ моли, молимся, нам победительная на враги даровати;/ тебе бо ко владыце тепла молитвенника стяжахом,// подающему миру вёлию милость.
Возсия днесь пресветлая память твоя,/ богомудре иакове,/ созывающи ны празднолюбцы/ к похвалению и славе христа бога нашего./ Тем притекающе к раце мощей твоих,/ исцеления дар приемлем,/ и тебе прославльшаго спаса христа воспеваем во веки,// непрестанно славяще.
Отче преблаженне иакове,/ днесь любовию сошедшеся к честней и чудотворней твоей раце,/ светло торжествующе,/ гласы песненными псаломски вопиюще глаголем:/ блажен муж бояйся господа,/ непорочно бо в заповедех господних ходил еси./ Темже ныне с праведными на небесех водворяешися,/ с нимиже молися господеви,// спастися душам нашым.
Слава, глас 6: Приидите, вси великаго новаграда народи,/ сошедшеся возвеличим христова рачителя;/ сей бо измлада покори плоть духу,/ и по господним стопам изволи ходити,/ на земли жестоко житие показа,/ ангелы убо удиви,/ демоны же устраши,/ и человеки просвети./ К немуже сице рцем:/ радуйся, терпеливый душею,/ иже тленное мудрование оставил еси,/ и нетленный венец приял еси;/ радуйся, светильниче многосветлый, и к богу молитвенниче теплый,/ иже злокозненнаго врага до конца под ногами стерл еси;/ радуйся, иакове предивный, небесный человече, земный ангеле,/ и ныне на небесех у престола предстоиши всецаря христа,/ к немуже за ны молися,/ верою и любовию празднующыя твое честное пренесение,// спастися душам нашым.
И ныне, богородичен: Богородице, ты еси лоза: Славословие великое. И отпуст.
На литургии служба преподобническая.
Публикуется по книге «Служба со Акафистом на пренесение мощей святаго Иакова чудотворца Боровичскаго. Месяца Октоврия в 23 день» (ПЕТЕРБУРГ. В Синодальной типографии. 1887). В тексте службы убраны упоминания об Императоре, замененные на «православный народ» или «люди».